SICHITHWE nezindleko yiNkantolo eNkulu yaseMgungundlovu ngoLwesihlanu, isiphakamiso esifakwe wuhlangothi lweqembu lepolitiki i-Abantu Batho Congress oluchitha uMnuz Philani Mavundla njengomengameli walo.
Emaphepheni amukelwe yinkantolo ngo-Ephreli 12 kulo nyaka, lolu hlangothi luthi uMavundla akasiyena umholi weqembu.
Luveza ukuthi sewaxoshwa ngakho akanalo ilungelo lokuqoka uhlu lwabazolimela iqembu ephalemende likazwelonke nasezishayamthetho zezifundazwe nasezifundeni okhethweni lukazwelonke ngenyanga ezayo.
Uhlelo lokwamukelwa kohlu lwabaphakanyiselwe ukumela amaqembu, inhlangano yezokhetho i-Independent Electoral Commission, luvalwe ngenyanga edlule.
Bafuna inkantolo iphoqe le nhlangano ukuthi yamukele uhlu okuthiwa ludidiyelwe ubuholi ababusekayo kuchithwe oluhlelwe ngokukaMavundla. Lokhu bekufakwe njengesicelo esiphuthumayo.
UMnuz Sabelo Sithole osohlangothini oluphikisa ubuholi bukaMavundla, exoxa neSolezwe, uthe isizathu sokuchithwa kwalesi siphakamiso okwamanje, yingoba abamele uMavundla babhalele abahlangothi lwabo incwadi beveza iphutha elenziwe inkantolo lokubanikeza usuku oluseduze ukuthi baphendule kwazise amaphepha afakwe ngo-Ephreli 12.
Ngokomthetho, kumele silalelwe ngo-Ephreli 26, ekubeni ngokwamaphepha asenkantolo kumele banikezwe izinsuku ezingu-15 ukuphendula.
“Lokho kube yiphutha lenkantolo kodwa elizolungiswa njengoba kusasa (namhlanje) abameli bezobuyela ukuze kutholakale usuku olusha.
“Lolu daba luyaphuthuma njengoba ngokweqembu uMavundla akasesiye umholi walo futhi akanalo ilungelo lokudlulisela kwa-IEC uhlu lwabazomela iqembu emva kokhetho lwangenyanga ezayo,” usho kanje.
UMavundla uthe akukho okubajabulisayo ngalesi sinqumo ngoba kwasekuqaleni ubelokhu emile kulokhu abakholelwa kukhona njengeqembu, akukho okushintshile.
“Laba bathunywe abathile ukudicilela phansi i-ABC. Wuhlelo lwabo ukugqigqa izinkantolo. Wonke amacala asebawafakile, inkantolo iwachithile. Yimina onelungelo njengomengameli we-ABC lokuqoka uhlu lwabazomela iqembu, lokho akukashintshi.
“Engithanda ukukusho kubantu ukuthi i-ABC esayiqala isekhona, iyasebenza futhi ilungenele ukhetho kuzwelonke nasezifundazweni,” usho kanje.